Սարյան 22-ում մեկնարկել է ակցիան. ժողովուրդը պահանջում է բացել ճանապարհը
Հանրային ծառայությունները կարգավորող հանձնաժողովի շենքի դիմաց՝ Սարյան 22 հասցեում, մեկնարկել է «Դեմ ենք էլեկտրաէներգիայի թանկացմանը» նախաձեռնության ակցիան։ Ներսում մեկնարկում է այս թեմայով քննարկումը, որին քաղակտիվիստներից որեւէ մեկին հնարավորություն չեն տվել մասնակցել։
Այստեղ՝ Սարյան 22 հասցեում, ակցիայի մասնակիցները պահանջում են հանձնաժողովից՝ խելամիտ որոշոմ կայացնել ու ձեռնպահ մնալ էլեկտրաէներգիայի թանկացումից, ինչը էլ ավելի կխորացնի աղքատությունն ու հանրության շրջանում հիասթափության ալիքը։
Ցուցարարների թիվը 100-ից ավելի է, այստեղ են նաեւ ոստիկաններ, որոնց թիվը գրեթե նույնն է։ Նրանք փակել են դեպի հանձնաժողով տանող ճանապարհը՝ խոչընդոտելով ոչ միայն ցուցարարների, այլեւ հետիոտնի անցուդարձը։ Երեւանի փոխոստիկանապետ Վալերի Օսիպյանը նշեց, որ ոստիկանությունը գործում է օրենքին համապատասխան, եւ որեւէ անօրինական գործողություն չի արվում. «Անհոգ եղեք, եթե բնակիչներն ուզենան անցնել, մենք թույլ կտանք»։
Ակտիվիստներից Հայկ Ավետիսյանը բարձրախոսով կոչ արեց ոստիկաններին՝ բացել ճանապարհը, քանի որ խախտում են հասարակական կարգը։ Օսիպյանը ցանկանում էր դիմել մասնակիցներին բարձրախոսով, սակայն վերջիններս չթողեցին՝ «ամոթ-ամոթ» վանկարկումներով։ Այս պահին պահանջում են բացել ճանապարհը, սակայն ոստիկանությունը չի կատարում այդ պահանջը։
