Նախագահի չկայացած թեկնածուի միտքն ու հոգին՝ կոնֆլիկտի մեջ
Շահագրգիռ պետություններն ու քաղաքական ուժերը, այդ թվում նաև Հայաստանի իշխանություններն են ուղղորդում, որ Ցեղասպանությունից 99 տարի հետո հայերը պահանջեն ոճիրի ճանաչում և ոչ թե հատուցում: «Ա1+»-ի հետ զրույցում այսպիսի կարծիք հայտնեց Ծիծեռնակաբերդ այցելած ինժեներ-մեխանիկ, փիլիսոփա Պավել Սարգսյանը: Նա ներկայացավ որպես նախագահի չկայացած, խոչընդոտված թեկնածու, քանի որ 2013թ. նախագահական ընտրություններին չէր մասնակցել՝ պահանջված ընտրագրավը վճարել չկարողանալու պատճառով: Պավել Սարգսյանի խոսքով՝ եթե Ցեղասպանության հարցում նման քաղաքականությունը պետական, պաշտոնական մակարդակով է վարվում, ապա դա արդեն ոչ թե սխալ է, այլ հանցագործություն: Սարգսյանը նշեց, որ խնդրի լուծմանը պետք է հասնել նախ բարոյական դաշտում, ապա քաղաքական: «Բարոյական դաշտում մենք պետք է թույլ չտանք, որ մեր ցավը շահարկվի տարբեր ինստանցիաներում»,- ասաց նա: Սարգսյանը հավելեց, որ ԱՄՆ սենատում, տարբեր հանձնաժողովում, նաև այլ երկրներում ամեն տարի՝ ապրիլի 24-ի նախաշեմին, Ցեղասպանության մասին բանաձևեր են ընդունվում, հետո մարդիկ իրենց բիզնեսն անում են թուրքերի հետ, և Ցեղասպանությունը մոռացվում է մինչ հաջորդ ապրիլի 24: Անդրադառնալով Արևմտյան Հայաստանի տարածքների հնարավոր վերադարձին՝ Պավել Սարգսյանը նշեց, որ Արցախի տարածքները 20 տարի է, ազատագրված են, բայց բնակեցված չեն: «Հողը նրանն է, ով ապրում է վրան: Ո՞վ է գնացել էնտեղ ապրելու: Ընդհակառակը, Ղարաբաղի հայերը արտագաղթել են էնտեղից»,- ասաց նա: «Այսինքն՝ Արևմտյան Հայաստանը մեր սերունդներն էլ չե՞ն տեսնելու» հարցը լսելուց հետո Պավել Սարգսյանն ասաց, որ հարցը իր միտքը և հոգին մտցրեց կոնֆլիկտի մեջ: «Սրտանց, զգացմունքներով, էությամբ այլ է իմ ցանկությունը, բայց առողջ տրամաբանությունս դրան արգելակում է: Դուք իմ մտավորը և զգացմունքայինը բախման եք տանում էդ հարցում, որովհետև ցանկությունը, զգացմունքը և արդարությունը մի բան է ասում, իսկ հնարավորությունը, առողջ դատողությունը՝ այլ բան»,- նշեց նա: Ի դեպ, Պավել Սարգսյանը նախագահական ընտրություններից հետո զբաղվում է իր ընտանեկան հարցերով, առնչվում քաղաքականության մեջ ակտիվ երիտասարդներին, նաև աջակցում «Դ!եմ եմ» շարժմանը: Ծիծեռնակաբերդ այցելած երևանցի թոշակառու, մասնագիտությամբ ինժեներ Կիմա Կարապետյանը «Ա1+»-ի հետ զրույցում կարծիք հայտնեց, որ վաղուց ժամանակն է՝ Հայաստանի պետությունը Թուրքիայից պահանջի Ցեղասպանության հատուցում և ոչ թե ճանաչում, դատի տա ցեղասպանին: Թոշակառուին զարմացնում է, թե ինչո՞ւ Հայաստանում չի ձևավորվում որևէ մարմին, հանձնաժողով, որը կզբաղվի Թուրքիայից հայերի փոխհատուցմամբ: «Մենք ղեկավար չունենք: Տեսնո՞ւմ եք՝ Պուտինը ինչ արեց: Ղրիմը վերցրեց, որ Ղրիմը իսկապես Ռուսաստանն է: Ապրի Պուտինը: Մի հատ այ էդպիսի Պուտին էլ մեզ է հարկավոր: Պուտինի նման ղեկավարը բոլոր հարցերը կդնի առաջը, կասի՝ այ, էս կետերը՝ էդ մարդիկ իրենց տուն-տեղ թողել են, հարստությունը թողել են, թալանել եք բոլորը»,- ասաց Կիմա Խաչատրյանը: Նրա իր վանեցի ծնողներից լսել է, որ Վանը դրախտային վայր է եղել: Այն, որ Վանում հզոր ինքնապաշտպանություն եղավ, թոշակառու կինը բացատրում է նրանով, որ վանեցիները թասիբ ունեն:
