Տեղեկացրեք, եթե ձուն կասկածելի տեսք ունի
«Իրազեկ եւ պաշտպանված սպառող» ՀԿ նախագահ Բաբկեն Պիպոյանը ուրախ է, որ Սուրբ Զատկի տոնին ձվի դեֆիցիտ չի լինի։ Սակայն միաժամանակ նրան մտահոգում է այն փաստը, որ կա արտադրանքի աճ: «Ուստի վերահսկողություն իրականացնող մարմինները ուշադիր պետք է լինեն եւ փաստաթղթաշրջանառությանը հետեւելով՝ բավական կլինի հասկանալ ժամկետանց ձու կունենանք, թե՞ ոչ»,-ասաց նա։ Նա սպառողներին հորդորում է , եթե Զատկի տոնին ժամկետանց հավկիթ գնեն, անպայման արագ արձագանքեն: «Սպառման ծավալները Զատկի տոնին ավելանում են։ Սպառողը պետք է գիտակցի, որ եթե իր հետ նման դեպք է պատահում, նույնը կարող է լինել նաեւ մյուս սպառողների հետ։ Մյուսներին պաշտպանելու համար պետք է անպայման արձագանքել»,- «Ա1+»-ին ասաց Բաբկեն Պիպոյանը։ Նա հիշեցրեց, որ թարմ ձուն տարբերվում է ինչպես արտաքին տեսքից, այնպես էլ կոտրելուց հետո։