5000 սփյուռքահայեր կմասնակցեն ծրագրին
ՀՀ սփյուռքի նախարարի պաշտոնակատար Հրանուշ Հակոբյանի ղեկավարությամբ տեղի ունեցավ ՀՀ վարչապետի որոշմամբ ստեղծված՝ սփյուռքի նախարարության 2014 թվականի «Իմ Հայաստան» համահայկական փառատոնի, Սփյուռքի երիտասարդների հայրենաճանաչության «Արի տուն» և «Սփյուռք» ամառային դպրոցի ծրագրերը համակարգող միջգերատեսչական հանձնաժողովի անդրանիկ նիստը: 2014 թվականի ծրագրերի շրջանակներում նախատեսվում է շուրջ 5000-ից ավել սփյուռքահայերի մասնակցություն: Ծրագրերի մասնակիցների հիմնական մասը սփյուռքահայ երիտասարդներն են: «Իմ Հայաստան» համահայկական երկրորդ փառատոնը կմեկնարկի հուլիսի 1-ին և կընթանա 5 փուլով` «Պարարվեստի օրեր», «Խմբերգային արվեստի օրեր», «Ասմունքի երեկո», «Դուդուկի և հայկական այլ նվագարանների փառատոն», «Հայ երգի օր»: Փառատոնի ծրագրի շրջանակներում կանցկացվեն միջոցառումներ Հայաստանի տարբեր քաղաքներում և Արցախում: «Արի տուն» ծրագրի տևողությունը հունիսի 15-ից օգոստոսի 30-ն է, որը կընթանա 8 փուլով: Նախատեսվում է շուրջ 1000 սփյուռքահայ պատանիների և աղջիկների մասնակցություն: Նրանք 9 օր կանցկացնեն հյուրընկալ ընտանիքներում, 5 օր՝ «Արի տուն» ճամբարում: Նշվեցին ծրագրի կազմակերպման նպատակով պետական գերատեսչությունների հետ համագործակցության ուղիները: «Սփյուռք» ամառային դպրոցն իրականացվում է հուլիսի 7-ից օգոստոսի 2–ը Երևանի պետական համալսարանի հետ համատեղ և ներառում է հայոց լեզվի արագացված ուսուցման, Սփյուռքի ուսուցիչների վերապատրաստման, ազգային երգի ու պարի, սփյուռքահայ երիտասարդ առաջնորդների, Սփյուռքի լրագրողների և Սփյուռքի համայնքային գործի կազմակերպիչների դասընթացներ: Ծրագիրը կարևորվում է հատկապես մայրենիի դասավանդման, պահպանմանն ու տարածմանը նպաստելու առումով:
