Հեմոֆիլիայով հիվանդները բուժման համար մեկնում են արտերկիր (տեսանյութ)
Հայաստանում հեմոֆիլիայով տառապող 236 մարդ է ապրում, նրանցից 57-ը երեխաներ են: Այսօր՝ Հեմոֆիլիայի համաշխարհային օրը, մասնագետները հիշեցնում են` հեմոֆիլիան ժառանգական ծանրագույն հիվանդություն է` պայմանավորված արյան մեջ մակադրման գործոնների պակասով: Այս հիվանդությամբ տառապող մարդկանց մոտ մակարդման խանգարումը արտահայտվում է հաճախակի արյունազեղումներով հոդերում, մկաններում և ներքին օրգաններում: Բուժումը թանկ արժե` մեկ հակահեմոֆիլային պատրաստուկի տարեկան պահանջարկի արժեքը կազմում է 12 հազարից 13 հազար դոլար: «Վերջին տարիներին մեր կառավարության կողմից բավականին մեծացել են դեղորայքի գնման գումարները, անցյալ տարի գնվել է 400 հազար հեմոֆիլիայի ֆակտոր, որ բավարարում է հեմոֆիլիայով հիվանդների սուր արյունահոսական դեպքերի բուժման համար»,- ասաց պրոֆ. Ռ.Օ. Յոլյանի անվան Արյունաբանական կենտրոնի տնօրեն Սմբատ Դալբաշյանը: Այնուհանդերձ, ոլորտը շարունակում է խոցելի մնալ՝ արձանագրում են մասնագետները: Հիվանդության բուժման համար անհրաժեշտ է զարգացնել պրոֆիլակտիկ մեթոդները: Այս պահին արյունաբանական կենտրոնի հսկողության տակ է գտնվում չարորակ արյունաբանական հիվանդությունով տառապող մոտ երկու հազար մարդ: Կենտրոնի փոխտնօրեն Նատա Մելքիկյանի խոսքերով` մի շարք հիվանդությունների բուժման համար չկան անհրաժեշտ ֆինանսներ և տեխնիկա: Հենց այս բացի պատճառով է, որ շատ հիվանդներ բուժման համար մեկնում են արտերկիր: Ի դեպ, Համաշխարհային բժշկության մեջ 7 թանկարժեք հիվանդություններ կան, որոնցից մեկը հենց հեմոֆիլիան է:
