Ապամոնտաժվում են կրպակներ. Փոխհատուցում չեն խոստանում (տեսանյութ)
Կորյունի 10 հասցեում այս պահին կրպակներ են ապամոնտաժում, որոնք, ըստ կրպակատերերի՝ օրինական են կառուցված, քաղաքապետարանի հետ ունեն համապատասխան պայմանագիր դեռ 2008 թ-ից։ Սակայն երբ պայմանագրի վավերացումը թարմացնելու համար կրպակատերերը գնացել են քաղաքապետարան, այստեղ ասել են, որ պետք է բոլոր կրպակներն ապամոնտաժվեն։ Այս պահին կրպակատերերը հետեւում են, թե ինչպես է ջարդուփշուր արվում իրենց եկամտի աղբյուրը։ Կրպակներից մեկը օպտիկա է եղել, մյուսը՝ սննդի կետ, երրորդը՝ պատճենահանման կետ եւ այլն։ Ինչպես հայտնում է «Ա1+»-ի թղթակիցը, քաղաքապետարանի աշխատակիցները չեն պատասխանում լրագրողների հարցերին, ցույց չեն տալիս համապատասխան որոշումը, ըստ որի իրականացվում է գործողությունը. նրանք խորհուրդ են տալիս դիմել լրատվության բաժին։ Ի դեպ, կրպակատերերն այս հարցով ավելի վաղ դիմել են դատարան, և մայիսի 5-ին պետք է կայանար դատական նիստը, իսկ քաղաքապետարանը չի սպասել դատավարությանը։ Բացի այդ, որեւէ փոխհատուցում կրպակատերերին չեն խոստանում։ Ավելի ուշ քաղաքապետարանը հայտնեց. Երևանի քաղաքապետարանի աշխատակազմի քաղաքաշինության և հողի վերահսկողության վարչության, հասարակական կարգի պահպանության ծառայության, Կենտրոն վարչական շրջանի ղեկավարի աշխատակազմի համապատասխան բաժինների համատեղ ուժերով ապամոնտաժվել են Կորյունի 10 և Տերյան 72 հասցեներում` Բժշկական ուսումնարանի հարևանությամբ գտնվող առևտրային տաղավարները։ Ինչպես տեղեկացնում են քաղաքապետարանի աշխատակազմի քաղաքաշինության և հողի վերահսկողության վարչությունից, ապամոնտաժված 2 ոչ հիմնական շինություններով ծանրաբեռնված հողամասերի օգտագործման համար գույքային իրավունքի որևէ գրանցում չի եղել և, ըստ էության, այդ հողամասերն օգտագործվել են ապօրինի։ Քանդման ենթակա 2 տաղավարները Երևան համայնքի սեփականություն հանդիսացող հողամասերի վրա են։ Դրանք վարձակալական իրավունքով նախկինում տրամադրվել են քաղաքացիներին։ Վարձակալության ժամկետներն ավարտվել են դեռևս 2009 թվականին։ Ի դեպ, պատասխանատուները վստահեցնում են, որ տաղավարներն օգտագործողները բազմիցս իրազեկվել են ապամոնտաժման աշխատանքների մասին։ Տաղավարների քանդման և Երևան համայնքի սեփականությունը հանդիսացող հողամասերի ազատման աշխատանքներն իրականացվում են Երևանի քաղաքապետի համապատասխան որոշումների հիման վրա։ Քանդման ենթակա կրպակներից մեկի մասով ապամոնտաժման և գործունեությունը դադարեցնելու մասին որոշում է կայացվել դեռևս 2012 թվականին՝ Կենտրոն և Նորք Մարաշ վարչական շրջանների ընդհանուր իրավասության դատարանի կողմից։ Հարկ է նշել, որ ապամոնտաժման ենթակա վերոնշյալ բոլոր շինությունների քանդման վերաբերյալ Երևանի քաղաքապետարանի գործողությունները սահամանափակող դատական որևէ ակտ փաստացի առկա չէ։ Ի դեպ, այս նույն տարածքում ապօրինի զբաղեցված ևս 1 տաղավար ավելի վաղ ապամոնտաժվել էր հենց օգտագործողի կողմից։ Երևանի քաղաքապետարանի համապատասխան վարչությունների և ստորաբաժանումների կողմից նմանօրինակ տաղավարների ապամոնտաժման գործընթացը շարունակական է։