ԳՐԱԴԱՐԱՆՆԵՐ ՄԻԱՅՆ ԱՄՆ ՄԱՍԻՆ
Աջակցիր «Ա1+»-ին
Այսօրվանից Հայաստանում կսկսի գործել թվով երկրորդ ամերիկյան կենտրոնը, որի բացումը տեղի ունեցավ այսօր Հայաստանի գիտատեխնիկական կենտրոնի Գյումրու մասնաճյուղում:
Ամերիկյան կենտրոններն իրենցից ներկայացնում են փոքրիկ, ամերիկյան ոճի գրադարաններ, որ ձեւավորվում են ԱՄՆ Պետքարտուղարության ֆինանսավորմամբ: Գրադարանների նպատակն է նպաստել Հայաստանի եւ Միացյալ Նահանգների միջեւ փոխըմբռնման մակարդակի բարձրացմանը` Ամերիկայի մասին պատմող տպագիր ու էլեկտրոնային տեղեկությունների աղբյուրներ ապահովելու ճանապարհով:
Ամերիկյան կենտրոններն ունեն բազմազան անգլիալեզու գրականություն, հանրամատչելի տեղեկատու նյութեր Միացյալ Նահանգների մասին, ինտերնետային կապով համակարգիչներ օն-լայն տվյալների շտեմարաններից օգտվելու համար, լազերային սկավառակներ ու տեսաերիզներ:
Այս ծրագրով ԱՄՆ դեսպանատունը Գյումրու ամերիկյան կենտրոնին է տրամադրել երեք համակարգիչ, շուրջ 300 գիրք, եւ այլ տպագիր ու էլեկտրոնային տեղեկատու նյութեր: Բացի բազմազան տեղեկատու նյութերի ապահովումից` կենտրոնն իր հարկի տակ կհյուրընկալի նաեւ դասախոսություններ, սեմինարներ, տեսաշարերի ցուցադրում եւ այլ միջոցառումներ:
Ի դեպ, ԱՄՆ դեսպանատունը Հայաստանում առաջին ամերիկյան կենտրոնը բացել է այս տարվա ապրիլին Երեւանի Ավետիք Իսահակյանի անվան կենտրոնական գրադարանում: Նախատեսվում է առաջիկա տարիներին Հայաստանում ձեւավորել Ամերիկյան կենտրոնների ցանց: